مرايـــــــا 4

لم أستطع بكلماتي أن اُدوّن مقدمة لأسطري التالية .. إلا أنني وددت فقط أن أقول :

أن التالي هو الفرق بين حديث الرجال مع بعضهم ، والنساء مع بعضهن عبر الهاتف .. وأنني قد كتبتها باللهجة العامية لأن الحديث استوجب مني ذلك ..

حديث الرجال ..

- سلام عليكم ...

- وعليكم السلام والرحمة ، أبو طلال ؟

- ايوه ، ابو طلال معك .. كيفك ابو ياسر ؟ وكيف الاولاد ؟

- الحمد لله .. حنا بخير ، دامكم انتو بخير يالطيب .

- تسلم .. انا حبيت اقولك تجينا تشرفنا في حفل زواج ولدي طلال ليلة الخميس ، في صالة السيف بالخبر .

- الف مبروك يا ابو طلال ، وعقبال الاولاد الباقين يارب .. حنا حاضرين لك ياخوي .

- الله يخليك يا ابو ياسر .. هذا المعهود منك .. نشوفك على خير أجل .. سلام عليكم .

- على خير يارب .. في أمان الله .

حديث النساء ..

- السلام عليكم ورحمة الله .

- وعليكم السلاااااااااااااام ورحمة الله وبركاته .. الغالية ام طلال ؟

- عليك نور .. انا ام طلال .. كيفك ام ياسر؟ وكيف الاولاد أحمد وخالد ؟

- الحمد لله .. يسلمون عليك والله ..

- وكيف تهاني و صبا وربا ؟

- بعد يسلمون عليك ويسألون عن أخبارك .. أقول ام طلال .. كأني أسمع صوت جنبك ؟

- اي والله .. هذا ولدي عبودي .. صار عمره ثلاث سنوات وانتي بعدك ما شفتيه .. خذيه كلميه شوي ..

- خاااااااااااااله .. خاااااااااااااااله ..

- شلونك حبيبي عبودي .. شنو تلعب ؟

- العب .

-شنو تلعب ؟

- العب .. العب .. العاب ..

- ليش مانمت ؟

- ماااااا أبغي أنام ..

- وين اختك حنان ؟

- مادري ..

- ليش ما تجي بيتنا ؟

- بجي مع الماما ..

- طيب .. خلاص يا حبيبي .. وين الماما ؟

- هلا والله .

- هلا وغلا .

- ام ياسر .. لا يكون وقت اتصالي خطأ ؟

- لا حياك يا خويتي في اي وقت ..

- تغديتوا ؟

- لا بعدنا .. اليوم كان عندي موعد بالمستشفى .. فما سويت غداي الا متأخر ..

- يعطيك العافيه .. شفيك رايحة المستشفى ؟

- الله يعافيك .. بس كان موعد اسنان ..

- اممممم .. اي مستشفى ؟ ابن سينا ؟

- اي والله .. كالعادة .. عند الدكتورة ......

- صحيح ما قلتي لي .. شنو غداكم ؟

- كبسه ..

- وانتي ؟

- حنا صايمين اليوم ..

- على ذكر الصيام .. شريتوا أغراض لرمضان ؟

- لا والله .. يمكن بكره نروح نشتري .

- حنا شرينا الاغراض البارحه .. عقبالكم -

- الله يسلمك .. ياحظكم خلصتوا ..

- اقول ام ياسر : لحظه وبرجع لك ..

- خذي راحتك ..

وبعد 4 دقائق ..

- الووووو

- هلا ..

- سامحيني ياخويتي .. بس رحت أرد على تلفون البيت .. طلعت امي متصلة .. تسلم عليك ..

- الله يسلمك ويسلمها من كل شر .. شلونها هي والوالد ؟

- الحمد لله .. عموما ام ياسر .. ولو اني ما ودي اتركك .. بس بقوم اشوف عبودي شنو يبي مني ..

- خلاص اخليك براحتك .. بس متى نشوفك يا ام طلال ؟

- والله ما ادري .. الظروف صعبة هالأيام .. في النهار ما يناسبني الوقت .. وفي الليل يعيي ابو طلال اطلع ..

- يعني لو يجتمعون عندي الجارات .. ما تقدري تجي لنا ؟

- والله ما اعتقد ..

- اجل متى ربي يكتب ونشوفك ؟

- الله اعلم .. لحظه ام ياسر .. لحظه ..

- شنو ؟

- ذكرتيني .. اشوفك في زواج ولدي طلال .. انا اصلا متصله عليك .. ابغيك تشرفينا ليلة الخميس الجايه ..

- الف الف مبروك .. طلال بيتزوج ؟ الله يخليه يارب ويبلغك لتشوفي اولاد اولاده .. بس .. وين بيكون الزواج ؟

- بصالة السيف .

- الخبر .. صحيح ؟

- اي .

- ممممممم .. حلو .. بس بكم استأجرتوها ؟

- والله ما ادري .. هذا شغل ابو طلال ..

- اي مشغل بتروحي ؟

- اللمسه .

- خير ما اخترتي .. بس ما اوصيك اختاري احسن عاملة .

- اكيد .. لا توصي حريصه ..

- طيب ام ياسر .. استأذنك الحين .

- نشوفك على خير يالغاليه ..

- الله يسلمك .. صحيح ام ياسر ..

- هلا والله ..

- اذا لقيتي فرصة هاليومين .. تعالي زوريني .. نفسي استشيرك في كم شغلة من شغلات الزواج ..

- على خير ان شاء الله .. وبالمره خليني اشوف فستانك .

- ابشري باللي تبين يالغالية ..

- يسلمك ربي ..

- يللا اخليك الحين ..

- نشوفك على خير ..

- على خير ..

- في امان الله ..

- الله معاك .

- ومعاك يارب ..

- سلمي على اختك ام رائد .

- يوصلها سلامك ان شاء الله ..

- هي بخير هالايام ؟

- الحمد لله .

- الله يخليها ..

- دعواتك .

- لا توصيني .. تراي حريصة ..

- الله يخليك ..

- ويحفظك دوم .

- يللا سلام عليكم .

- وعليكم السلام والرحمة .

تمت